পুঠিমাৰী নদীৰ বান্ধ ভাঙি উদালগুৰিত বান পৰিস্থিতি, সতৰ্ক প্ৰশাসন

উদালগুৰি জিলাৰ পুঠিমাৰী নদীৰ বান্ধৰ প্ৰায় ত্ৰিশ মিটাৰ অংশ আজি পুৱা ভাঙি পৰাৰ ফলত নদীপাৰৰ বাৰটাতকৈও অধিক গাঁও প্লাৱিত হৈছে। প্ৰবল বৰষুণৰ ফলত নদীখনৰ পানীৰ স্তৰ বিপদসীমাৰ ওপৰেৰে বৈ থকাৰ সময়তে এই ঘটনা ঘটে।

জিলা দুৰ্যোগ ব্যৱস্থাপনা বিভাগৰ এজন বিষয়াই কয়, "আমি খবৰ পোৱাৰ লগে লগে NDRF ৰ এটা দল আৰু স্থানীয় স্বেচ্ছাসেৱকক ঘটনাস্থললৈ প্ৰেৰণ কৰিছোঁ। এতিয়ালৈকে কোনো হতাহতৰ খবৰ পোৱা নাই, কিন্তু বহু পৰিয়াল ঘৰ এৰি আশ্ৰয় শিবিৰলৈ যাবলগীয়া হৈছে।"

স্থানীয় বাসিন্দা এজনে কয়, "মাত্র কেইঘণ্টাৰ ভিতৰতে পানী ঘৰৰ চোতাললৈ সোমাই আহিল। আমি বহুত সা-সম্পত্তি লৈ যাব নোৱাৰিলোঁ।" জিলা প্ৰশাসনে গাঁওসমূহত পাঁচটা ত্ৰাণ শিবিৰ স্থাপন কৰিছে, য'ত প্ৰায় পাঁচ শ পৰিয়ালক আশ্ৰয় দিয়া হৈছে।

জলসিঞ্চন বিভাগে জনায় যে বান্ধ মেৰামতিৰ কাম আজিয়েই আৰম্ভ হৈছে আৰু বালিৰ বস্তা পেলাই অস্থায়ীভাৱে ফুটা বন্ধ কৰাৰ চেষ্টা কৰা হৈছে। বিভাগৰ মতে স্থায়ী মেৰামতিলৈ অন্তত এসপ্তাহ সময় লাগিব।

জিলা উপায়ুক্তই বাসিন্দাসকলক নিৰাপদ স্থানলৈ যোৱাৰ আহ্বান জনাইছে আৰু কৈছে যে পৰিস্থিতিৰ ওপৰত সাৰ্বক্ষণিক নজৰ ৰখা হৈছে। ৰাজ্য চৰকাৰেও অতিৰিক্ত ত্ৰাণসামগ্ৰী পঠোৱাৰ আশ্বাস দিছে।